News Sticker
  •   PASTIKAN DIRI ANDA TERDAFTAR DALAM MENSUKSESKAN PEMILIHAN DAERAH GUBERNUR DAN WAKIL GUBERNUR DKI JAKARTA (15 FEBRUARI 2017)  PERGUB NOMOR 11 TAHUN 2017 TENTANG IKON BUDAYA BETAWI RESMI DITANDATANGANI OLEH (PLT) GUBERNUR DKI JAKARTA (1/2/2017)   PERATURAN GUBERNUR(PERGUB) IKON BUDAYA BETAWI ANTARA LAIN ONDEL-ONDEL, KEMBANG KELAPA, ORNAMEN GIGI BALANG, BAJU SADARIAH KEBAYA KERANCANG, BATIK BETAWI, KERAK TELOR DAN BIR PLETOK 

  • Martabak ini buat siape?

    Kojek Raper Betawi Januari 2017 Biodata

    Dugdugces dugdugces yo.yo.yo my name is kojek dug dug ces dug dug ces “Aam ngapain sih? Ngomong cepet begitu kaya enyak lo kalo lagi nyap-nyap” Ini ngerap Babehhhh Ngerap ngerap bukan belajar lo. Udeh semester 5 tuh kuliah yang bener, udeh kagak mao jadi guru, sekarang malah lo ngerap.

    Muhammad Amrullah alias Kojek emang lahir dari keluarga guru . Kojek adalah anak kedua dari dua besaudara yang lahir dari pasangan H. Muhammad Saman dan Hj. Ika Wastika. Keduanya memang guru SD. Mpoknye, Siti Ikhwani, juga seorang guru SMK.

    Nah, si Kojek emang beda. Die milih kuliah komunikasi. Padahal di awal mau kuliah die disuruh Enyak ame Babenye ikut tes di kampus yang nyetak guru. Emang die turutin tuh perintahnye, tapi kagak ngejauhin larangan orang tuanye. Daftar sih di kampus yang dimaksud, tapi die malah ambil jurusan Komunikasi.

    Cilakanye malah kagak lulus dan orang tuanye tahu kelakuannye. Abislah die dimarahin Babenye. “Dikasih tahu ame orang tua kagak denger sih malah semaonye,” begitu kata Babenya.

    “Kite pengen elo punya pegangan kaya Babe nih ame Enyak. Nanti kalo udeh pensiun tetep gajian. Terserah lo sekarang mao kuliah di mane deh, tapi jangan yang mahal banget gue kagak sanggup biayainnye,” lanjut Babe Saman.

    “Aam kamu pilih deh ape yang kamu mao, Ibu doain yang terbaik,” kata Enyaknya.

    Singkat cerita si Aam alias Kojek masuk tuh di kampus UNDIP ( Universitas Depan UI Salemba Persis ) he-he-he. Komunikasi tetep die ambil dengan penjurusan Public Relations, dengan arepan jadi pinter ngoceh. Semester demi semester dilakonin ampe di semester 5 die pindah kuliah malem di jamnye orang kantor. Pengen aje rasain katanye. Soalnye die enggak boleh kerja selagi kuliah. Biar fokus kate orang tua ame mpoknye.

    Di semester ini Kojek ketemu komunitas musik rap dan ikut gabung. Mulain deh rasa-rasanye hobi cuap-cuapnye muncul. Apelagi musik emang kedemenannye. Dengerin lagu-lagu Iwa K, Saykoji sampe Eminem adalah hal yang bikin die seneng.

    Di komunitas ini die banyak belajar dari nulis lagu ampe tiba waktunye diajak manggung. Cuman namenye orang tua keluarga guru, pengennye anak jadi guru, apelagi babenye paling empet banget kalo Kojek udeh mulain kaya orang nyap-nyap.


    Diskusi

    “Eh lo ngapain, sih? Musik Barat begitu lo ikutin. Bangga dong ame budaya bangsa ame budaya Betawi,” kata si Babe.

    Tapi tekad Kojek udeh bulet banget pengen dapet duit dari jadi rapper. Mulain deh manggung pulang malem dimarahin ame babenye. “Pulang malem pulang malem dapet duit kagak lo. Manggung sono manggung sini dapet duit kagak lo. Udeh kuliah yang bener biar lulus abis ntu lo kerja pake ijazah,” omel si Babe.

    Singkat kata si Kojek lulus nih kuliah, tapi wisudanye tahun depan karena telat daftar. Ya udeh kagak ape-ape, kata si Babe. Yang penting lo udeh lulus. Nih, lo beliin babe lo martabak telor spesial kedemenannye. Kite makan bareng-bareng ame mpok lo.
    Singkat kate singkat cerite…..

    Mulain deh Kojek kerja pake ijazah. Ngelamar sono-sini dapetlah kerjaan di salah satu bank. Tapi pas die dapet kerja, malah ada beberapa tawaran manggung. Dilemanye di sini nih. Pulang kerja malemnye manggung, pagi di kantor ngantuk secara manggungnye di klub-klub malem. Bertahan deh cuman sebulan tuh kerja di bank karena Kojek milih manggung. Walaupun dapetnye kecil, tapi demen.

    Nah di situlah Babe sempet ngelarang. Si Kojek bingung dan bimbang kagak punya kerjaan. “Eh lo manggung sono-sini, beliin gue martabak aje kagak mampu. Udeh kerja yang bener dah,” kata Babe. Akhirnye Kojek kerja lagi dimasukin temen di Bank Mandi Sendiri (paham dah). Baru kerja seminggu eh tahunye temen ada yang nawarin. “Jek ada promo nih ke Lampung. Acara dan interview radio di sana. Yuk, kan lo udeh punya lagu sendiri tuh. Pas banget tuh buat promosi,” katanye.

    “Yuk dah, yang penting mereka kasih ongkos ame makan kan ye?”
    “Iye,” kate temennye.

    Akhirnye Kojek manggung dan promo radio tuh di Lampung. Berangkat Jumat malem pulang Minggu. Hati seneng, cuman badan capek. Di tengah rasa capek sambil mikir puleslah die.

    Senen pagi dateng dan babenye nanya, “Eh, kagak kerja lo?”
    Dengan berat hati Kojek akhirnye bilang, “Kayaknye dunia saye bukan di kantor deh, Beh.”
    “Terus lo kagak pengen kerja,” tanya Babenye.
    “Ye kerja, Beh, ngerap jadi musisi.”
    Sontak si Babe kaget dan bilang, “Elo ini laki-laki, lo bakal jadi imam, lo kepala rumah tangga. Lo bakal punya anak yang kudu lo biayain. Mau kasih makan ape anak bini lo entar.”

    Sambil jalan Enyak nyamperin, “Udeh, Beh, kite liat aje. Kalo emang yakin jalanin Enyak doain.”

    “Idup bukan sekedar buat kerja, Beh. Mungkin udeh jalannye die begini,” Si Mpok Ani nambahin. Lalu Mpok Ani berangkat kerja sama enyak. Si babe di rume kan udeh pensiun.

    Karena kejadian ini si Kojek pengen buktiin ame semue bahwa dari jadi musisi die bisa banggain orang tua. Ikut deh lomba-lomba dan Kojek jadi juara. Pastinye juga dapet duit. Eh, dengan hati seneng saban pulang lomba dan menang, Kojek selalu bawain Babenye martabak telor kesukaannye. Dari yang ngelarang sampe akhirnye Babe malakin setiap Kojek pulang manggung. “Jangan martabak aje dong, bagi gue duit juga hehe.”

    Seneng rasanye jerih payah si Kojek bisa dinikmatin orang tua walaupun sekadar martabak telor. Babenye emang menderita penyakit gula, sampe-sampe makan kudu ditaker. Cuman kalo udeh martabak telor asik aje gitu liat die makan.

    Hari itu ada lomba rap battle di Depok. Juara satunye dapet 3 juta. Dari rumah udeh diincer tuh gelar juara. Impian tinggi buat menang bukan cuma buat beli martabak telor, tapi pengen kasih Babe sama Enyak duit. Walaupun mereka selalu bilang, “Kalo lo seneng kite juga seneng, duit lo pegang aje kite udeh punya gaji. Beliin aje tuh Babe lo martabak telor jangan lupa.” “Siap, Nyak,” kata Kojek.

    Penyisihan rap battle sampe semifinal disikat abis sama Kojek. Lawan pun tau die jawara, jadi keder juga ngelawannye. Cuman emang nasib berkata laen, di hari itu Kojek cuman jadi Juara 2 dan dapet hadiah 1,5 juta. Tetep seneng dan pengen banget beli martabak.

    Namun, di hari itu memang udeh malem. Perjalanan Depok ke Sunter cukup jauh dan si Kojek naek motor. Akhirnye Kojek mutusin buat nginep di rume temen. Singkat cerita udeh tengari lagi dan Kojek pengin cepet pulang ke rumah, beli martabak yang paling en super special, cuman ada yang ganjel di hati.

    Sempet bertanya juga dalem hati, ade ape ye. Kemaren die juga cuman juara 2 yang biasanye juara 1. Bahkan sempet ribut sama juri karena merasa dicurangin. Enggak biasa-biasanye sampe begitu, ya mungkin cuman firasat. Sebelom sampe rumah si Kojek mampir ke tukang martabak telor langganan. Kali ini yang super special bang buat babe. Kelar tuh martabak, Kojek pun pulang.


    Diskusi

    “Enyak, Assalamualaikum. Beh, Assalamualaikum. Ngape kagak ada yang nyaut ye,” pikirnya. Ternyata semua lagi di kamar, si Babe ngedrop. Gulanye kumat, dibawa deh ke rumah sakit. Sehabis salat Subuh Enyak telepon ke rumah. “Yang ikhlas ye, Babe lo udeh kagak ada. Babe lo udeh meninggal,” kata Enyak.

    Belom sedikit pun tuh martabak super special disentuh. Belom secuil tuh martabak dimakan. Belom nikmatin tuh martabak hasil anaknye juara lagi. Belom sempet Babe bilang enak dan makasih gue dibeliin martabak. Ternyata hari itu hari spesialnye Babe bukan cuman martabaknye. Hari itu dan setiap kali Kojek menang lomba dan beli martabak, dalem hati selalu bertanya, martabak ini buat siape?

    Innalilahi Wainailaihi Rojiun
    H.M Saman (26 Mei 2010)
    Wassalam
    Jakarta

    Related Post

    $(document).ready(function() {$('img#closed').click(function(){$('#bl_banner').hide(90);});});
    close
    Banner iklan disini